لە وەزارەتی داد رۆژی ئاڵای کوردستان بەرز ڕاگیرا

17 كانون1/ديسمبر 2019

بە ئامادەبوونی فەرسەت ئەحمەد وەزیری داد و دادوەر و بەڕێوبەرانی گشتی و راوێژکاران و فەرمانبەرانی وەزارەتی داد، ئەمڕۆ لە وەزارەتی داد؛ رۆژی ئاڵای کوردستان بەرز راگیرا.

لەو رێوڕەسمەدا وەزیری داد وتەیەکی پێشکەش کرد و تیایدا مانا و پێگەی قانوونی و بەهای نەتەوەیی و باگراوندی مێژوویی ئاڵای کوردستانی خستەڕوو، دووپاتی لەوە کردەوە کە ئەم ئاڵایە هەمان ئەو ئاڵایەیە کە لە کۆماری کوردستان لە مەهاباد لەلایەن پێشەوا قازی محەمەد بە ئامادەبوونی بارزانی نەمر، هەڵکراوە و پاش لەناوبردنی کۆماری کوردستان بە پیلانێکی نێودەوڵەتی، شەهیدی نەمر قازی محەمەد ئەم ئاڵایەی بە ئامانەت داوەتە دەستی سەرکردەی نەمر ژەنراڵ مستەفا بارزانی، مستەفا بازرانی نەمر، بەئامانەت رادەستی سەرۆک مەسعود بارزانی کردووە.

وەزیری داد ئاماژەی بە مانای رەنگەکانی سەر ئاڵاکە و خۆرە زەردەکەی کردو رایگەیاند، بەهاو پێگەی ئەم ئاڵایە لە هێزە مەعنەوویی و سیمبووڵیەکەیدایە کە پەرلەمانی کوردستان لە ساڵی ١٩٩٩ بە یاسا رێکیخستوە و دایناوە تا ئەمڕۆ بۆتە رەمزی خەباتی ئازادیخوازانەی گەلی کوردستان و نەتەوەی کورد لە دەرەوە و لە ناوەوەی کوردستاندا و هەزاران شەهید لە پێناویدا گیانی خۆیان بەخت کردووە .   

رۆژی ئاڵای کوردستان کە هەموو ساڵێک لە ١٧ی کانوونی دووەمدا یادی دەکرێتەوە، یەکێکە لە رۆژە گرنگ و مێژووییەکانی نەتەوەی کورد و گەلی کوردستانە کە هەموو ساڵێک لەم رۆژەدا لەسەرئاستی فەرمی و نافەرمی لە ناوەوەو لە دەرەوەی کوردستان، ئاهەنگ و رێوڕەسمی وتاری خوێندنەوەی بۆ سازدەکرێت

 ئەنجوومەنی نیشتیمانی کوردستان لە ١١/١١/١٩٩٩ بە بڕیاری ژمارە ٢٦ یاسای ژمارە ١٤ی ساڵی ١٩٩٩ی بۆ دەرکردوە کە بە یاسای ئاڵای کوردستان ناسراوە.

 

دەقی وتەی وەزیری داد، فەرسەت ئەحمەد، لە رۆژی ئاڵای کوردستان١٧-١٢-٢٠١٩:

         ئامادەبووانی بەرێز بەشداربووانی قەدرگران

ئەمڕۆ رۆژێکی پیرۆز و پڕسەروەرییە لە مێژوویی کوردستاندا کە رۆژی ئاڵای کوردستانە، ئەو ئاڵایەی بەرلە ٧٣ ساڵ لە گۆڕەپانی چوارچرا لە شاری مەهاباد لە رۆژهەڵاتی کوردستان ئەم ئالایە بەدەستی شەهیدی نەمر قازی محەمەد سەرۆککۆماری کوردستان بەرز هەڵدراوە، هەرچەندە کۆماری ساوای کوردستان بە پیلانێکی نێودەوڵەتی لە ناوبرا و کرایە قوربانی بەرژەوەندی دەوڵەتان، بەڵام ئاڵاکە بە پارێزراوی مایەوە چونکە لە رۆژی ١٧-١١-١٩٤٦ لە دەستی شەهیدی نەمر قازی محەمەدەوە بەئەمانەتەوە تەسلیمی سەرکردەی نەمر ژەنراڵ مستەفا بارزانی کرا، پاشان ئەمانەتەکە بە پارێزراوی درایە دەستی جەنابی سەرۆک مەسعود بارزانی.

بەڕێزان بۆ ئەوەی ئەم ئاڵایە بە پارێزراوی بمێنێتەوە و هەمیشە بەرز و بڵند و شەکاوە بێت، پەرلەمانی کوردستان لە ١١-١١-١٩٩٩ قانوونی ژمارە (١٤) ی بۆ دەرکرد و لە ٢٧/١١/١٩٩٩جێبەجێکرا .

ئەم ئاڵایە هەمان ئەو ئالایەیە کە هەموو رۆژێک بەرزی دەکەینەوە کە لە چوار رەنگ پێکهاتووە، رەنگی سوور رەنگی خوێنی شەهیدانی بزووتنەوەی ئازادیخوازی کوردستانە، رەنگی سپی رەنگی ئاشتی و ئەمانەت و لێبوردەیی و پێکەوەژیانە، رەنگی سەوز دەلالەتی ژینگەدۆستی و پاکی سروشت و جوانی کوردستانە، رۆژەکەی ناوەڕاستیش مانای بەردەوامی ژیانە، رەنگی زەردیش پێگەیشتن و عەقلانێت و حیکمەتمەدارییە، ٢١ تیشکەکەش هێمای ٢١/٣ ی رۆژی جەژنی نەورۆزی کوردستانە.

بۆیە ئەم ئاڵایە سومبڵ و دەلالەت و نیشانەی کەرامەت و عیزەتی میللەتی کوردستانە و ئەرکی هەر هاووڵاتییەکە بە بڵندیی و لە بەرزایەتیدا بیپارێزێت و جێگەی شانازیی هەر هاوولاتییەک بێت لەسەر ئاخی کوردستان و لە دەرەوەشی.

بەرزێتی بۆ ئاڵای کوردستان و نەمری بۆ شەهیدانی بزووتنەوەی ئازادیخوازیی کوردستان بێت، هەردەم سەرفرازو سەربڵند بن لەگەڵ ئاڵای کوردستان و سوپاس بۆ ئامادەبوونتان .    

وەزارەتـــــی داد لـــەفەیسبوکگۆگل ماپس

ناونیشان

ناونیشان: هەرێمی کوردستان-هەولێر

‌چواڕیانی فرنسوا میتران

 سۆسیال میدیا

پەیوەندی کردن

بۆ وەڵامدانەوەی پرسیارەکانتان سەبارەت بە هەر کارێکی پەیوەست بە وەزارەتی داد یا هەر فەرمانگەیەکی تری سەر بە وەزارەت دەتوانن پرسیارو داواکاری و سکاڵاکانتان لە رێگەی ئەم فۆرمەوە بنێرن

: iraq, irbil
: 2245522 - 2245515 - 2245507
  نامەکەت نەگەیشت.   نامەکەتە بەسەرکەوتووی گەیشت.
Top